Berriak
Uztailaren 26ko udal osoaren ohiko bilkuraren gai zerrenda
1.- Aurreko bilkuretako akten onespena, hala badagokio.
2.- Ohiko batzorde informatiboen maiztasuna aldatzea.
3.- 2023ko Udaleko Aurrekontua gauzatzeko udal arauaren aldaketaren hasierako onespena.
4.- Kreditu gehigarri bidez kredituak aldatzeko 4 zenbakidun espedientearen hasierako onespena.
Udalak eta Marea Urdinak parke estaliko kulunka laugarrenez puskatu izana salatu dute
Parke estaliko kulunka laugarren aldiz agertu da txikituta. Justu, aniztasun funtzionala duten haurrentzat egokitutako herriko kulunka inklusibo bakarra da, eta beraz, kaltea are eta mingarriagoa da.
Erabilera desegokia emateagatik puskatzen da kulunka eta aldiko konponketaren gastua ere esanguratsua da, mila euro inguru aldiko, alegia. Horren aurrean, Udalak eta Marea Urdinak eragindako kaltea gaitzetsi dute eta gizalegez jokatzeko eskatu dute, amankomunak diren espazioak, elementuak eta zerbitzuak zainduz eta errespetatuz.
Azkoitiko danborradaren omenez botako da aurtengo Andramarietako txupinazoa
Azkoitiko danborradak 75 urte bete ditu aurten, eta Udalak Andramarietako txupinazoa danborradari eskaini nahi dio, eta sortu zenetik gaur arte parte hartu duten danbor-jole, zuzendari, antolatzaile eta danborradarekin lotura zuzena duten guztiei aitortza egin.
Danborrada eta danborradaren atzean dauden gizon-emakume guztiei aitortza egiteko, danborradaren antolaketan paper esanguratsua izan duten pertsona erreferenteak igoko dira udaletxeko balkoira txupinazoa botatzeko. Edonola ere, danborradarekin lotura estua izan duten lagunak gonbidatuta daude egun horretan udaletxera, une hori partekatzera.
Munoaundira bisita gidatua egingo da larunbat honetan
Aranzadi Zientzia Elkartearen eskutik, larunbat honetan, uztailaren 22an, bisita gidatua egingo da Munoaundin, bertako Burdin Aroko Herri Harresitua ezagutu nahi dutenentzat.
Bisita gidatuan parte hartu nahi dutenentzat hitzordua jarri da hilaren 22an, 11:00etan, Abaraxka Aterpetxean (Altamira auzoa, 5). Ez dago aurrez izena eman beharrik. Nahikoa da ezarritako egun eta orduan hitzordura agertzea.
90 urte betetzen dituzten herritarren omenaldi-bazkarirako izen-ematea, gaurtik zabalik
Andramari jaietan, abuztuaren 17an, egin ohi den jubilatuen anai-arreba arteko bazkarirako izen-ematea zabalik dago gaurtik abuztuaren 4ra arte. Aurten bazkaria Elkarguneko Herriko plaza aretoan izango da, eta bertan aurten 90 urte bete dituzten edo beteko dituzten herritarrak omenduko dira.
Andramarietako koadrilen bazkarirako izen-ematea astelehenean zabalduko da
Aurtengo Andramari jaiak aurreratzen ari dira, eta Udalaren antolaketa lanak aurrera doaz. Festetako hitzordu nagusietako bat da abuztuaren 18ko koadrilen bazkaria. Parte hartu nahi dutenentzat izen-ematea astelehenean, uztailaren 17an, irekiko da eta uztailaren 28an itxiko da.
Azkoitiko Udaleko Kultura sailean eman beharko da izena bertara joanda, edo 943 85 71 70 telefonora deituta astelehenetik ostiralera 9:00etatik 14:00etara.
Hazinnova ziurtagiria jaso dute Erlo Group, Ibermach eta Urola Komunikazio Taldea enpresek
Hazinnova programari esker euren berrikuntza-proiektua arrakastaz ezarri duten Urola osoko, Goierri eta Debagoienako 37 enpresa gipuzkoarrek enpresa berritzailearen ziurtagiria jaso dute gaur, Eusko Jaurlaritzako Ekonomi Garapen, Jasangarritasun eta Ingurumen Sailaren, SPRIren eta Innobasque-Berrikuntzaren Euskal Agentziaren eskutik. Besteak beste, Azkoitiko Erlo Group eta Ibermach Special Machinery enpresek eta Urola Komunikazio Taldeak jaso dute akreditazioa.
Hazinnovak doako aholkularitza-zerbitzua eskaintzen die Euskadiko ETEei berrikuntza ez teknologikoari buruz, lehiakorragoak izan daitezen.
Mudejar artea ezagutzeko bisita gidatuak egingo dira asteburuan
Iraurgi Berritzenen turismo sailak bisita gidatuak antolatu ditu uztailerako eta abuzturako, bailarako ondarea ezagutarazteko eta bertako historiaz eta paisaiaz gozatzeko. Asteburuan, uztailaren 15ean eta 16an, mudejar artean sakontzeko bisita gidatuak egingo da. Larunbatean erdaraz izango da eta igandean, euskaraz.
Bi orduko ibilbidea izango da Azkoitian, Loiolan eta Azpeitian barrena. Parte hartu nahi dutenentzat topagunea goizeko 11:00etan, Azkoitiko parrokia aurrean izango da.
| Al | Ar | Az | Og | Or | Lr | Ig |
|---|---|---|---|---|---|---|
|
1
|
2
|
3
| ||||
|
4
|
5
|
6
|
7
| |||
|
11
|
12
|
13
|
14
|
15
| ||
|
19
|
20
|
21
|
22
| |||
|
26
|
27
|
28
|
29
| |||
