Berriak
Salbea eta danborrada, iruditan
Usadioari jarraituz, Andramari bezperan Ignacio Busca Sagastizabalen Salbea eta Aita Nemesio Otañoren Ave Maria abestu dituzte Parrokian herritarrek. Andramaixetako hitzordu kuttunenetakoa eta hunkigarriena da askorentzat gaur arratsaldekoa. Udal ordezkariak korporazioan egin dute elizatik joan-etorria. Juan Bautista Mendizabalek eraman du Azkoitiko bandera. Ondoren, 75. urteurrena oroitzeko, danborrada egin dute Herriko plazan, eta handik Plazaberritik barrena, Balda plazara iritsi dira danbor eta barril joleak. Ukitu berezia eman die danborradak aurtengo festei. Dotore hasi dira aurtengo gure Andramaixek! Ikusi iruditan arratsaldeak eman duena.
Festak hartu ditu herriko kaleak!
Lehertu da festa Azkoitian. Aurtengo Andramari jaiei hasiera eman dien txupinazoarekin batera, alaitasunez bete dira kaleak, eta ez da atsedenerako tarte handirik izango datozen egunetan. Jendeak gogotsu hartu ditu herriko festak.
Erlojuak 12:00ak jo baino minutu batzuk lehenago, danborradarekin lotura estua duten hainbat lagun bildu da udaletxean. Besteak beste, danborradaren atzean dauden gizon eta emakume guztien izenean, txupinazoa bota duten Justino Sasieta "Mateo", Ana Etxaniz “Olaberri”, eta Xanti Artetxe “Etxesa”. Ana Azkoitia alkateak egin die harrera, gainerako udal ordezkariak bidelagun dituela, eta esker oneko hitzak eskaini dizkie urte guzti hauetan danborrada ahalbidetu duten guztiei. Jada gure artean ez daudenak ere ekarri ditu gogora alkateak.
Floreaga auzoak bigarren igogailua estreinatu du
Floreagako irisgarritasuna hobetzeko bigarren faseko lanak amaituta, auzoko bizilagunek estreinatu dezakete gaur goizetik martxan dagoen igogailu berria.
"Bigarren igogailu honekin, auzoaren irisgarritasun-arazoaren zati handi bat konpondu dugu, eta hurrengo faseei jarraipena ematen saiatuko gara, goikaldean bizi diren auzotarrek ere ahalik eta erraztasun eta erosotasun handienarekin mugitzeko aukera izan dezaten", adierazi du Ana Azkoitia alkateak.
Andramari jaietako zapi urdinak banatuko ditu Udalak 14an
Udalak Andramari jaietako zapi urdinak banatuko ditu abuztuaren 14an, oraindik esku artean ez dutenentzat. Banaketa Kontzejupean egingo da 10:30etik 11:30era, justu txupinazoa bota aurretik. Nahi duenak gertura dadila eta doan jasoko du zapia.
Festetan gaueko autobus zerbitzu berezia
Azkoitiko Andramari jaietan gaueko autobus zerbitzu berezia eskainiko da abuztuaren 14an, 15ean, 16an eta 18an. Horra ordutegiak:
Miguel Mari Azpiazuk moldatutako piezak joko ditu plazako karilloi erlojuak festetan
Miguel Mari Azpiazu konpositoreak moldatutako piezak joko ditu plazako karilloi erlojuak Andramari jaietan. Eguerdiko hamabietan “Ondo pasau Andramaixek” entzungo da Herriko plazan, eta iluntzeko zortzietan, Azpiazuk berak konposatutako “Azkoitia” obraren doinuak.
Udalak Miguel Mari Azpiazuren lana eskertu nahi du publikoki karilloirako egindako moldaketa lanengatik, eta Jose Luis Ferro erlojugile-maisuari bere laguntzagatik.
Berdintasunezko eta eraso sexistarik gabeko jaien aldeko aldarria
Udalak, Berdintasun eta Prebentzio Sailetik, dei egiten du Andramari jaiak berdintasunean eta eraso sexistetatik aske ospa daitezen. "Azkoitian, ez ditugu onartzen pertsonen eskubideak urratzen dituzten eraso matxistak, arrazistak, LGTBIfobikoak edo bestelakoak. Ez dadila inor jokabide matxisten konplize izan", adierazi du Mertxe Zubillaga zinegotziak.
Aste honetan bertan, Ana Azkoitia alkatea Ertzaintzarekin eta Udaltzaingoarekin bildu da jaietako zaintza eta segurtasun-operatiboari buruzko xehetasunak jorratzeko, eta inork nahi ez dituen gertakariak eta delituak prebenitzeko.
Danborradarekin lotura estua duten guztiak udaletxera gonbidatuta daude festei hasiera emateko
Aurtengo Andramari jaietarako astebete baino ez da falta, eta Udalaren izenean, Ana Azkoitia alkateak “danborradarekin lotura estua duten eta sentitzen duten guztiak” udaletxera gonbidatu ditu hilaren 14an, 12:00etan, festa lehertaraziko duen txupinazoaz bertatik goza dezaten.
“Azkoitiko danborradak 75 urte bete ditu. Urte guzti hauetan gizon eta emakume askori esker antolatu ahal izan da. Asko dira modu batera edo bestera danborrada biziki estimatzen dutenak, eta danborradarekiko lotura eta sentimendu berezia dutenak, asko dira aitortza eta eskertza merezi dituztenak, eta haiek guztientzat doa aurtengo txupinazoa. Urtez urte, danborrada egitea posible egin duten guztiei dedikatuko diegu”, azaldu du alkateak.
| Al | Ar | Az | Og | Or | Lr | Ig |
|---|---|---|---|---|---|---|
|
1
|
2
|
3
| ||||
|
4
|
5
|
6
|
7
| |||
|
11
|
12
|
13
|
14
|
15
| ||
|
19
|
20
|
21
|
22
| |||
|
26
|
27
|
28
|
29
| |||
